بالی وڈ میں سنی دیول کا خاص مقام

(19 اکتوبر سالگرہ کے موقع پر)
ممبئی:مشہور اداکار سنی دیول کا شمار ان منتخب اداکاروں میں کیا جاتا ہے جنہوں نے تقریباً تین دہائی پر مشتمل فلمی سفر کے دوران اپنی بہترین اداکاری سے شائقین کے دل میں ایک خاص مقام بنارکھا ہے۔سنی دیول کی پیدائش 19اکتوبر 1956 کو ہوئی تھی۔اداکاری کا ہنر انہیں وارثت میں ملا۔ان کے والد دھرمیندر ہندی فلموں کے مشہور اداکار ہیں۔گھر میں فلمی ماحول ہونے کی وجہ سے سنی دیول اکثر اپنے والد کے ساتھ شوٹنگ دیکھنے جایا کرتے تھے اسی وجہ سے ان کا رجحان بھی فلموں کی جانب ہوگیا اور وہ بھی اداکار بننے کے خواب دیکھنے لگے۔سنی نے ابتدائی تعلیم ممبئی سے پوری کی۔اس کے بعد انہوں نے انگلینڈ کے مشہور اولڈ بوائے تھیئٹر میں اداکاری کی تعلیم لی۔سنی نے اپنے کریئر کی شروعات اپنے والد کی فلم بے تاب سے کی۔1983میں راہل رویل کی ہدایت میں بنی یہ فلم سپر ہت ثابت ہوئی۔فلم بے تاب کی کامیابی کے بعد سنی دیول کو سوہنی مہیوال،منزل منزل ،سنی جیسی فلموں میں کام کرنے کا موقع ملا لیکن ان میں سے کوئی فلم ٹکٹ کھڑی پر کامیاب نہ ہوسکی۔
سال1985 میں سنی دیول کو ایک بار پھر سے راہل رویل کی ہدایت میں بنی فلم’ارجن‘میں کام کرنے کا موقع ملا جو ان کے کریئر کی ایک اور سپر ہٹ فلم ثابت ہوئی۔اس فلم میں سنی نے ایک ایسے نوجوان کا کردار ادا کیا جو سیاست کی دلدل میں پھنس جاتا ہے۔فلم کی کامیابی کے ساتھ ہی سنی دیول ایک بار پھر سے فلم انڈسٹری میں اپنی کھوئی ہوئی شناخت حاصل کرنے میں کامیاب ہوگئے۔فلم ارجن کی کامیابی کے بعد سنی کی شبیہ اینگری ینگ مین اسٹار کے طورپر بن گئی۔اس فلم کے بعد پروڈیوسر،ہدایت کاروں نے زیادہ فلموں میں سنی دیول کی اسی شبیہ کو پیش کیا۔ان فلموں میں سلطنت،ڈکیت ،یتیم،انتقام،پاپ کی دنیا جیسی فلمیں شامل ہیں۔سال 1990 میں ریلیز ہوئی فلم’’گھایل‘‘سنی کے کریئر کی اہم فلموں میں شمار کی جاتی ہے۔فلم میں اپنی بہترین اداکاری کے لئے سنی دیول کو بہترین اداکار کے طوپر فلم فیئر کے ایوارڈ کے ساتھ ہی قومی ایوارڈ سے بھی نوازا گیا۔سال1991 میں ریلیز ہوئی فلم ’نرسمہا‘سنی کے کرئیر کی ایک اور سپرہٹ فلم رہی۔این چندرا کی ہدایت میں بنی اس فلم میں سنی دیول کا کردار پوری طرح گرے شیڈ لئے ہوئے تھا،باوجود اس کے ان کی اداکاری شائقین کو پسند آئی اور فلم سپر ہٹ ہوگئی۔
سال1993میں ریلیز فلم ’دامنی‘سنی کے فلمی کریئر کی ایک اور اہم فلم ثابت ہوئی۔یوں تو یہ پوری فلم میناکشی شیشادری کے ارد گرد گھومتی ہے لیکن سنی نے اپنی بہترین اداکاری سے شائقین کے دل جیت لئے۔فلم میں اپنے بہترین رول کےلئے وہ بہترین اداکار کے قومی ایوارڈ اور فلم فیئر ایوارڈ سے نوازے گئے۔سال 1993سے 1996کا وقت سنی کے کریئر کےلئے برا ثابت ہوا۔اس دوران ان کی کئی فلمیں کامیاب نہیں ہوسکیں۔1997 میں ریلیز ہوئی فلم ’’بارڈر‘‘اور ’ضدی‘کی کامیابی کے بعد سنی فلم انڈسٹری میں ایک بار پھر سے اپنی کوئی ہوئی شناخت پانے میں کامیاب ہوگئے۔بارڈر میں انہوں نے مہاویر چکر حاصل کرنے والے میجر کلدیپ سنگھ کے رول میں جان ڈال دی تھی۔سال 1999میں سنی دیول نے فلم ’دل لگی‘کے ذریعہ فلم سازی اور ہدایت کاری کے میدان میں قدم رکھا۔سال 2001 میں ریلیز فلم’غدر ایک پریم کتھا‘ان کے فلمی کریئر کی بہتر فلم ثابت ہوئی۔حب الوطنی کے جذبے سے لبریز یہ فلم شائقین کو کافی پسند آئی۔ساتھ ہی یہ فلم آل ٹائم ہٹ فلموں میں شمار کی گئی۔سنی نے اپنے کریئر میں اب تک 90 فلموں میں اداکاری کی ہے۔سنی آج بھی اسی جوش و خروش کے ساتھ فلم انڈسٹری میں سرگرم ہیں۔سنی کی دیگر فلموں میں گھایل کا سیوئل گائل ونس اگین، پوسٹر بائیز ، ڈر، جاٹ، یملہ پگلا دیوانہ، غدر2 بھیا جی سپرہٹ شامل ہیں۔ آج کل سنی دیول چنندہ فلموں میں ہی کام کررہے ہیں، اس کے علاوہ وہ سیاست میں بھی سرگرم ہیں۔