شیبو سورین کی حیات و خدمات پر لکھی گئی کتاب’ بابائے جھارکھنڈ‘پیش کی
رانچی:ڈاکٹر جمال احمد نے آج وزیرِ اعلیٰ جھارکھنڈ جناب ہیمنت سورین سے ملاقات کی اور شیبو سورین کی حیات و خدمات پر مبنی اپنی تازہ تصنیف “بابائے جھارکھنڈ انہیں پیش کی۔ اس موقع پر وزیرِ اعلیٰ نے کتاب کا مطالعہ کرتے ہوئے مصنف کی علمی کاوش کو سراہا اور کہا کہ شِبو سورین کی جدوجہد اور عوامی خدمات کو اردو زبان میں پیش کرنا ایک قابلِ ستائش قدم ہے۔ڈاکٹر جمال احمد نے بتایا کہ یہ کتاب تاریخ کے صفحات پر کندہ ایک امرت سادھنا ہے۔ جب آئندہ نسلیں اس کتاب کو پڑھیں گی تو انہیں صرف جھارکھنڈ کی جدوجہد نہیں بلکہ شِبو سورین کی آواز بھی سنائی دے گی۔مصنف کے مطابق یہ اردو میں پہلا جامع دستاویزی ریکارڈ ہے جس میں شِبو سورین کی سیاسی، سماجی اور فکری شخصیت کو اردو کے قالب میں پیش کیا گیا ہے۔ یہ کتاب صرف ایک تاریخی دستاویز نہیں بلکہ جھارکھنڈ کی ثقافتی روح کی تجدید کی علامت ہے۔ یہ “پرجا” یعنی عوام کی بیداری اور شعور کی نمائندہ ہے۔کتاب میں معاشرے کی مختلف پرتوں کا مطالعہ بھی کیا گیا ہے۔ اس میں سماج کے مختلف طبقوں، برادریوں اور عوامی طبقات کے میل جول اور اشتراک کو ایک مربوط شکل میں پیش کیا گیا ہے۔ڈاکٹر جمال احمد کے مطابق یہ تصنیف نسلوں کے درمیان ایک مکالمہ ہے — وقت سے پرے ایک گفتگو۔ اس میں مصنف کی عمر کو علامتی طور پر 105 برس سے 25 برس تک پھیلا کر دکھایا گیا ہے، تاکہ ہر نسل کی آواز اس کتاب میں شامل ہو۔ کشمیر سے لے کر مہاراشٹر، بہار سے لے کر جنوبی ہند تک، یہ کتاب ایک جغرافیائی و فکری پھیلاؤ کو سمیٹتی ہے۔کتاب کے بارے میں کہا گیا ہے کہ یہ جھارکھنڈ کی سماجی تاریخ کا ضمیر اور عوامی تحریکات کی زندہ دستاویز ہے۔ یہ صرف ہمارے وقت کی نہیں بلکہ آنے والے زمانوں کے لیے بھی ایک قیمتی سرمایہ ہے۔ جب مستقبل میں لوگ جھارکھنڈ کی کہانی پڑھیں گے تو یہ کتاب ان کے لیے رہنمائی کا ذریعہ بنے گی، کیونکہ اس میں صرف تاریخ نہیں بلکہ وہ روح بھی ہے جس نے تاریخ کو جنم دیا۔
