تعلیمی بیداری پر سیمینار کا انعقاد، نوجوانوں کو نشہ سے روکنے پر زور

رانچی: ہیلتھ انڈیا ویژن اور مومن پنچایت الہی نگر کے مشترکہ زیر اہتمام یک روزہ سیمینار کا انعقاد کیا گیا۔ تعلیمی اور سرکاری خدمات کے اداروں کے نمائندوں نے اسکول چھوڑنے کی شرح اور نوجوانوں میں منشیات کی بڑھتی ہوئی عادت پر تفصیل سے روشنی ڈالی۔ مقررین نے واضح کیا کہ معاشی غربت اور خاندانی ڈھانچے میں مسلسل اتار چڑھاؤ بچوں کو اسکول چھوڑنے پر مجبور کر رہے ہیں۔ دوسری جانب غربت اور والدین کے لاپرواہی کے رویے منشیات کی لت میں اضافے کا باعث بن رہے ہیں۔ سیمینار کے کوآرڈینیٹر محمد معراج نے بتایا کہ ریاستی حکومت کی مڈ ڈے میل اسکیم اور دیگر اسکیموں نے اسکول چھوڑنے کی شرح کو کم کیا ہے، لیکن یہ ناکافی ہے۔ انہوں نے اس بات پر زور دیا کہ سماجی تعاون اور کمیونٹی کی کوششیں ڈراپ آؤٹ کی شرح کو کم کر سکتی ہیں۔ اس کیلئےاجتماعی کوششیں اور سماجی ذمہ داری ضروری ہے۔ مذہبی رہنماؤں کو بھی اپنی سطح پر تعلیم کے فروغ کیلئےکردار ادا کرنا چاہیے۔ انہوں نے معاشرے، خاص طور پر بچوں میں منشیات کے بڑھتے ہوئے رجحان کے لیے معاشرے، والدین کی سنگین غفلت اور پولیسنگ کے نظام کو ذمہ دار ٹھہرانے کی ضرورت پر زور دیا۔ این جی او کے نمائندوں نے کہا کہ وہ حکومت کے ساتھ مل کر کام کرنے کے لیے پرعزم ہیں ،تاکہ ڈراپ آؤٹ کو روکا جا سکے۔ پروگرام کی نظامت محمد حفیظ انصاری نے کی۔ اس موقع پر محمد جسیم، ڈاکٹر کوشل، عادل اختر، سیف عالم، عبدالرحمن، سریندر کمال، آنند سنگھ، جیوتی لکڑا، مجید عالم، انیتا دیوی، وکاس سنگھ، راغب عالم کے علاوہ دیگر موجود تھے۔