جدید ٹیکنالوجی پر مبنی آبپاشی منصوبوں کو لاگو کرنے کی کوششیں جاری :ہیمنت

رانچی: ہر کھیت میں پانی کی پہنچ کو یقینی بنانے کے عزم کے ساتھ، وزیر اعلیٰ ہیمنت سورین ریاست بھر میں آبپاشی کی سہولیات کو بڑھانے کے لیے مسلسل کام کر رہے ہیں۔ اس سلسلے میں جدید ٹیکنالوجی پر مبنی کئی میگا لفٹ اریگیشن پروجیکٹوں کا سنگ بنیاد رکھا گیا ہے جن میں مسلیہ-رانیشور میگا لفٹ اریگیشن پروجیکٹ بھی شامل ہے۔ ◆وزیر اعلیٰ نے آج مسلیہ-رانیشور میگا لفٹ ایریگیشن پروجیکٹ کا معائنہ کیا، جو فی الحال سدھیشوری ندی پر زیر تعمیر ہے، اور کام کی پیشرفت کا مکمل جائزہ لیا۔ ایم ایل اے آلوک کمار سورین، چیف سکریٹری اویناش کمار، اور سکریٹری پرشانت کمار بھی چیف منسٹر کے معائنہ کے دوران موجود تھے۔
معائنے کے دوران وزیر اعلیٰ نے کہا کہ یہ میگا لفٹ اریگیشن پروجیکٹ دمکا کیلئے بہت اہم ہے۔ یہ ضلع کے مسلیہ اور رانیشور بلاکس میں 22,000ہیکٹر سے زیادہ اراضی کو آبپاشی کی سہولت فراہم کرے گا۔ اس لیے اس میگا لفٹ اریگیشن پروجیکٹ پر باقی ماندہ کام کو جلد مکمل کیا جائے تاکہ اسے کسانوں کے لیے وقف کیا جا سکے۔
چیف منسٹر نے یہ بھی کہا کہ مسلیہ -رانیشور میگا ایریگیشن پروجیکٹ کو اس طرح سے لاگو کیا جارہا ہے جس سے اس کے کثیر مقصدی استعمال کو یقینی بنایا جاسکے۔ جہاں یہ ایک بڑے علاقے کو آبپاشی کی سہولت فراہم کرے گا، وہیں ندی کے اضافی پانی کو تالابوں اور آبی ذخائر میں بھی موڑا جا سکتا ہے۔ اس کی تکمیل سے سیاحت کو بھی فروغ ملے گا، روزگار کے نئے مواقع پیدا ہوں گے۔ اس لیے اس میگا لفٹ اریگیشن پروجیکٹ کے ذریعے سدھیشوری ندی کے پانی کا بھرپور استعمال کرنے کے ریاستی حکومت کے وژن کو پورا کرنا چاہیے۔
مسلیہ -رانیشور میگا لفٹ اریگیشن پروجیکٹ کی تعمیر کرنے والی کمپنی ایل اینڈ ٹی کے عہدیداروں نے وزیر اعلیٰ کو بتایا کہ پروجیکٹ کا تقریباً 80 فیصد کام مکمل ہو چکا ہے۔ ایک بیراج بنایا جا رہا ہے، جو تقریباً تیار ہے۔ 15 گیٹس پر بھی 90 فیصد سے زائد کام مکمل ہو چکا ہے۔ تین پمپ ہاؤسز میں سے ایک مکمل ہو چکا ہے، اور دو پر کام جاری ہے۔ پانچ ڈیلیوری چیمبرز بنائے جا رہے ہیں جن میں سے تین مکمل ہو چکے ہیں اور باقی دو جلد مکمل کر لیے جائیں گے۔ انہوں نے وزیر اعلیٰ کو بتایا کہ اگلے سال جنوری تک تقریباً 6400 ہیکٹر اراضی پر زیرزمین پائپ لائنوں کے ذریعے آبپاشی کی سہولیات دستیاب ہوں گی۔
مسلیہ-رانیشور میگا لفٹ اریگیشن پروجیکٹ ریاستی حکومت کا ایک انتہائی اہم منصوبہ ہے۔ سدھیشوری ندی پر بنایا جا رہا یہ میگا لفٹ اریگیشن پروجیکٹ مسلیہ بلاک کی 15 پنچایتوں اور رانیشور بلاک کی چار پنچایتوں کے تحت 226 گاؤں میں زیر زمین پائپ لائنوں کے ذریعے 22,283 ہیکٹر اراضی کو آبپاشی کی سہولت فراہم کرے گا۔ چیف منسٹر جناب ہیمنت سورین نے نومبر 2022 میں مسلیہ-رانیشور میگا لفٹ ایریگیشن پروجیکٹ کا سنگ بنیاد رکھا تھا جس کی لاگت 1,313 کروڑ روپے تھی۔