آئین قومی ترقی، سماجی انصاف اور عوامی فلاح کا مضبوط رہنما ہے: گورنر
رانچی: وزیراعلیٰ ہیمنت سورین نے یومِ آئین کے موقع پر بابا صاحب ڈاکٹر بھیم راؤ امبیڈکر سمیت تمام آئین سازوں کو خراجِ عقیدت پیش کرتے ہوئے کہا کہ ہندوستان کا آئین ہمیں مساوات، انصاف، آزادی اور اخوت کے بنیادی اصولوں پر ایک کرتا ہے۔ انہوں نے ایک سوشل میڈیا پوسٹ میں لکھا کہ آئین صرف ایک دستاویز نہیں بلکہ ایک مقدس گرنتھ ہے، جو ایک ترقی پسند، شمولیتی اور انصاف پر مبنی ملک کی بنیاد ہے۔ وزیراعلیٰ نے کہا کہ اس موقع پر ہم سب یہ عہد کریں کہ آئین کے اعلیٰ اصولوں کو زندگی میں اختیار کرکے ہر شہری تک ترقی، عزت و وقار اور حقوق کی رسائی یقینی بنائیں۔ انہوں نے ملک کے تمام عوام کو یومِ آئین کی مبارکباد دی۔اپنے ایک اور پیغام میں، انہوں نے 26/11 ممبئی دہشت گردانہ حملے میں وطن کی حفاظت کرتے ہوئے شہید ہونے والے بہادر سپاہیوں کو یاد کرتے ہوئے کہا کہ ان کا عزم، بہادری اور فرض کے تئیں غیر متزلزل وفاداری کو قوم ہمیشہ یاد رکھے گی۔ گورنر سنتوش کمار گنگوار نے یومِ آئین پر کہا کہ ہندوستان کا آئین نہ صرف دنیا کی سب سے بڑی جمہوریت کا نمائندہ ہے بلکہ یہ ملک کی ترقی، سماجی انصاف اور عوامی بہبود کا بنیادی رہنما بھی ہے۔ انہوں نے کہا کہ آئین کے اصولوں کو اپنا کر ہی ہم ایک طاقت ور، مساوات پر مبنی اور خوشحال بھارت کی تشکیل کر سکتے ہیں۔گورنر نے شہریوں سے اپیل کی کہ وہ آئین میں درج اقدار—انصاف، آزادی، مساوات اور اخوت—کو اپنی روزمرہ زندگی اور اجتماعی کردار میں شامل کریں اور قوم سازی میں فعال کردار ادا کریں۔انہوں نے بدھ کو کولہان یونیورسٹی کے کنووکیشن تقریب میں آئین کی تمہید مل کر پڑھوایا۔ اس موقع پر یونیورسٹی کے عہدیداران، اساتذہ، طلبہ اور محققین بڑی تعداد میں موجود تھے۔
