ریاست کو اپنے ہاتھوں سےسجانا اور سنوارنا ہے:ہیمنت
رانچی: وزیراعلیٰ ہیمنت سورین کی قیادت میں تقرریوں کا سلسلہ تیزی سے آگے بڑھ رہا ہے۔ جمعہ کو راجدھانی رانچی کے مورہابادی میدان میں وزیراعلیٰ نے 8792 امیدواروں کو تقرری نامے فراہم کیے۔ان میں ڈپٹی کلکٹر، پولیس ڈپٹی سپرنٹنڈنٹ، جیل سپرنٹنڈنٹ، جھارکھنڈ ایجوکیشن سروس، ڈسٹرکٹ سپرنٹنڈنٹ، لیبر سپرنٹنڈنٹ، پروبیشن افسر، انسپکٹر پروڈکٹ، دانت کے ڈاکٹراور اسسٹنٹ پروفیسر سمیت مختلف محکموں کے عہدے شامل ہیں۔ وزیراعلیٰ نے بتایا کہ اس سال 16 ہزار سرکاری تقرریاں کی گئی ہیں، جبکہ غیر سرکاری اداروں میں آٹھ ہزار نوجوانوں کو روزگار ملا۔ سال 2020 سے 2024 کے دوران 24 سے 25 ہزار سرکاری تقرریاں عمل میں آئیں، جبکہ 28 ہزار تقرریاں نجی اداروں اور کمپنیوں میں ہوئیں۔ اپنے خطاب میں وزیراعلیٰ نے اپوزیشن پر نشانہ بھی سادھا اور کہا کہ اپوزیشن ہماری کارکردگی پر سوال اٹھانے سے نہیں تھکتی۔ عدالتوں میں بھی ہمارے کاموں میں رکاوٹیں کھڑی کی جاتی ہیں۔ ایسے کئی عناصر موجود ہیں جو نوجوانوں کے مستقبل کے خلاف سازشوں میں لگے ہیں۔ وزیراعلیٰ نے کہا کہ موجودہ حکومت پوری شفافیت اور خلوص کے ساتھ نوجوانوں کا مستقبل سنوارنے میں مصروف ہے۔ انہوں نے نئے تقرر یافتہ امیدواروں سے پوچھا کہ کیا کسی کی تقرری پیسے یا سفارش سے ہوئی ہے؟ تمام نے یک زبان ہو کر "نہیں” میں جواب دیا۔ وزیراعلیٰ نے کہا کہ آپ کو آپ کی قابلیت اور اہلیت کی بنیاد پر جگہ ملی ہے۔ حکومت پڑھے لکھے، کم پڑھے لکھے اور ناخواندہ سبھی طبقات کے لیے حساس ہے۔ انہوں نے بتایا کہ 50 لاکھ خواتین کو مئیاں سمّان یوجنا سے جوڑ کر بااختیار بنایا گیا، جس کا اثر آج ہر سمت دکھ رہا ہے۔ اساتذہ کی تقرری میں 40 فیصد اور جے پی ایس سی میں 30 فیصد خواتین کو موقع ملا ہے۔ وزیراعلیٰ نے کہا کہ ریاست کو اپنے ہاتھوں سے سجانا اور سنوارنا ہے، ہمارے آبا و اجداد نے اپنے خون سے اس دھرتی کو سینچا ہے، اس کی ذمہ داری ہم سب کے کندھوں پر ہے۔وزیراعلیٰ نے تعلیمی شعبے میں تیزی سے ہو رہی ترقی کا ذکر کرتے ہوئے کہا کہ ریاست میں 80 ایکسیلنس اسکول، 10 ڈگری کالج، آٹھ نرسنگ کالج، چھ میڈیکل کالج اور چھ انجینئرنگ کالج قائم ہوئے ہیں۔ تیز رفتار تبدیلی کے لیے مزید اقدامات کیے جا رہے ہیں۔ انہوں نے کہا کہ نیک نیتی اور مضبوط ارادے سے ہر مشکل اور طوفان کا مقابلہ کیا جاسکتا ہے، اسی حوصلے سے اتنی بڑی تعداد میں تقرریاں ممکن ہوئیں۔سی ایم نے کہا کہ تقرری یافتہ امیدواروں کا آج سے عمر بھر حکومت سے رشتہ قائم ہو گیا ہے۔ انہوں نے کہا کہ آج یہاں جتنی بھیڑ نظر آ رہی ہے، اتنی تعداد عام جلسوں میں بھی کم ہی دیکھنے کو ملتی ہے۔اس موقع پر کابینی وزراء رادھا کرشن کشور، ڈاکٹر عرفان انصاری، یوگندر پرساد، شلپی نیہا ترکی، سنجے پرساد، سودیو کمار سونو، دیپیکا پانڈے سنگھ، حفیظ الحسن انصاری، چمرا لنڈا، دیپک بیروا، رکن پارلیمان مہوا مانجھی اور رکن اسمبلی کلپنا سورین سمیت کئی اہم افسران موجود تھے۔
