’ماہی‘ نےمکتب کے 52 بچوں میں سویٹر تقسیم کیے

رانچی:مولانا آزاد ہیومن انیشیٹو (MAHI) کی جانب سے آج مکتب مسجد ابوبکر، ہندپیڑھی، لاہ فیکٹری روڈ کے52 بچوں کے درمیان سویٹر تقسیم کیے گئے۔ یہ اقدام سرد موسم کے پیش نظر ضرورت مند طلباء کی مدد کیلئےشروع کیا گیا تھا۔یہ بات قابل غور ہے کہ ہر سال، ماہی ہندوستان کے پہلے وزیر تعلیم اور جدید تعلیم کے علمبردار مولانا ابوالکلام آزاد کےیوم پیدائش کی یاد میں The Cold is Bold – A Initiative by Mahiمہم کا انعقاد کرتی ہے۔ یہ مہم عام طور پر 11 سے 18 نومبر تک چلتی ہے لیکن اس سال بڑھتی ہوئی سردی اور طلباء کی ضروریات کو مدنظر رکھتے ہوئے اسے نومبر کے پورے مہینے تک بڑھا دیا گیا ہے۔ماہی کا مقصد اس بات کو یقینی بنانا ہے کہ یونیفارم، سویٹر یا جوتے جیسی بنیادی سہولیات کی کمی کی وجہ سے کوئی بھی ہونہار اور ضرورت مند بچہ تعلیم سے محروم نہ رہے۔ پروگرام میں بنیادی طور پر تنظیم کے صدر سید اعجاز احمد، سیکریٹری محمد آصف اقبال، سرپرست محمد انصار، آدرش ویلفیئر سوسائٹی کے صدر نور عالم، ہیلتھ کوآرڈینیٹر شکیل احمد کے علاوہ محمد عاصم، محمد اختر، محمد معراج، محمد اسلم قریشی، امام محمد دانش، مؤذن محمد جمشید اور حاجی محمدتوحید کے علاوہ کئی سماجی کارکنان نے شرکت کی۔