سڑک حادثے میں زخمیوںکےلئے مفت ایمبولینس سروس عنقریب

کولکاتا،30نومبر: سڑک حادثے میں زخمیوں کو فوری طور پر اسپتال منتقل کرنے کے مقصد سے ، مغربی بنگال حکومت جلد ہی مفت ایمبولینس سروس شروع کرے گی۔ ریاستی محکمہ صحت کے ایک سینئر عہدیدار نے پیر کو یہ معلومات دی۔ انہوں نے بتایا کہ ابتدائی طور پر 150 ایمبولینس فراہم کی جائیں گی۔
انہوں نے کہا کہ ریاستی حکومت حادثات اور قریبی اسپتالوں میں سب سے زیادہ متاثرہ مقامات کا تفصیلی نقشہ تیار کررہی ہے۔ عہدیدار نے بتایا کہ یہ خدمت بنیادی طور پر جی پی ایس پر مبنی ہوگی اور اس کےلئے ریاستی حکومت کو تقریباً 30 کروڑ کا بوجھ اٹھانا پڑے گا۔
انہوں نے کہا’اس سے سڑک حادثات میں زخمی ہونے والوں کی جانیں بچانے میں ہماری مدد ملے گی۔ ہمارا مقصد یہ ہے کہ حادثے کی اطلاع ملنے کے 15 سے 20 منٹ کے اندر اندر زخمیوں کو قریبی اسپتال یا ٹراما سنٹر پہنچایا جائے۔ ابھی اس کی منصوبہ بندی کی جارہی ہے اور ہم اسے جلد سے جلد شروع کردیں گے‘۔
عہدیدار نے بتایا کہ اس سروس کے تحت دو طرح کی ایمبولینس کی سہولیات میسر ہوں گی۔ انہوں نے کہا کہ ایک قسم کی ایمبولینس میں لائف سپورٹ کا ضروری نظام ہوگا اور دوسری میں لائف سپورٹ کا جدید نظام ہوگا۔ انہوں نے کہا کہ ایک ٹول فری نمبر بھی دیا جائے گا۔ انہوں نے کہا کہ اس اسکیم کے بارے میں محکمہ صحت اور محکمہ تعمیرات ، پولیس اور محکمہ ٹرانسپورٹ کے مابین بات چیت جاری ہے۔