گانجہ اور جعلی نوٹ کے ساتھ 4گرفتار

مالدہ،31،اکتوبر: خفیہ ذرائع سے موصولہ خبر کی بنیاد پر تھانہ کالیاچک نے 4 افراد کوگانجہ اور جعلی نوٹ کے ساتھ گرفتار کیا۔ ملزموں میں ایک نوجوان خاتون بھی شامل ہے۔ جمعہ کی رات دیر گئے تھانہ کالیاچک کے چاند پور سے اسمگلروں کی ایک ٹیم کو گرفتار کیا گیا۔ ملزمان سے 7 کلو گانجا اور 14 ہزار 500 روپے کی جعلی کرنسی برآمد ہوئی ہے۔ ملزمان کالیاچک سے غیر قانونی بھنگ اور جعلی کرنسی کی کھیپ نکالنے کا منصوبہ بنا رہے تھے۔ پولس نے چاروں کو مالدہ عدالت میں پیش کیا اور تفتیش کےلئے 5 دن کے ریمانڈ پر لے گئی۔ پولس ذرائع نے انکشاف کیا ہے کہ ملزمان کے نام عمران بسواس ، اسار الدین شیخ ، انوپ داس اور شبانہ خاتون شامل ہیں۔ یہ لوگ تھانہ کالیاچک کے سوج پور ، گیش باڑی اور چاریانت پور علاقوں کے رہائشی ہیں۔ ملزمین سے 10 پلاسٹک کے پیکٹ ملے جن میں بھنگ بھری تھی۔ اس کے ساتھ ہی پولیس نے 14 ہزار 500 روپے کے جعلی 5-5 سو نوٹ بھی قبضے میں لیے ہیں۔ پولس نے بتایا کہ جمعہ کے روز خفیہ ذرائع سے اطلاع ملنے کے بعد پولس نے چاند پور کے علاقے میں سول ڈریس میں جال بچھا کر غیر قانونی مواد سمیت ملزم کو گرفتار کرلیا۔ جب ملزم چاند پور کے علاقے میں اسٹینڈ پر پہنچا تو ان سے تفتیش کے دوران ان سے یہ غیر قانونی سامان نکلا۔ تھانہ کالیاچک نے بتایا کہ ملزموں میں ایک نوجوان خاتون بھی شامل ہے ، جس کی عمر صرف 20 سال ہے۔ پولس نے بتایا کہ غیر قانونی تاجروں کی ایک ٹیم غریب خاندانوں کی لڑکیوں کو غیر قانونی بھنگ اور جعلی نوٹ سمگلنگ سمیت دیگر مجرمانہ سرگرمیوں میں پھنسانے کی بھرپور کوشش کر رہی ہے۔ ابتدائی تفتیش میں پولس نے بتایا کہ ملزمان بطور کیریئر کام کرتے تھے۔ تھانہ کالیاچک اس معاملے کی تحقیقات کر رہا ہے۔